పరారే.. పరారే…!!

సోమిరెడ్డి చంద్రమోహన్ రెడ్డి

మాజీ మంత్రి సోమిరెడ్డి చంద్రమోహన్ రెడ్డి భయపడిపోతున్నారు. పోలీసులు ఎక్కడ అరెస్ట్ చేస్తారోనని ఆయన అజ్ఞాతంలోకి వెళ్లిపోయారు. సోమిరెడ్డి చంద్రమోహన్ రెడ్డి కోసం ఇప్పటికే వెతుకులాట ప్రారంభమయింది. అమరావతి, నెల్లూరు, హైదరాబాద్ లలో సోమిరెడ్డి చంద్రమోహన్ రెడ్డి కోసం ప్రత్యేక బృందాలు బయలుదేరి వెళ్లాయి. తనను అరెస్ట్ చేయకుండా ముందస్తు బెయిల్ ఇవ్వాలని సోమిరెడ్డి చంద్రమోహన్ రెడ్డి హైకోర్టును ఆశ్రయించారు. ఈ నెల 9వ తేదీన పోలీసుల ఎదుట విచారణకు హాజరవుతానని చెప్పి నోటీసులు అందుకున్న సోమిరెడ్డి చంద్రమోహన్ రెడ్డి ముందస్తు బెయిల్ కోసం ప్రయత్నిస్తున్నట్లు తెలుస్తోంది.

భూ కబ్జా కేసు నమోదు….

నెల్లూరు జిల్లాలో కీలక నేతగా ఉన్న సోమిరెడ్డి చంద్రమోహన్ రెడ్డిపై భూ కబ్జా కేసు నమోదయిన సంగతి తెలిసిందే. అయితే వెంకటాచలం పోలీసులు సోమిరెడ్డి చంద్రమోహన్ రెడ్డికి నోటీసులు అందజేశారు. విచారణకు హాజరుకావాల్సిందిగా కోరారు. తాను ఈనెల 9వ తేదీన హాజరవుతానని చెప్పిన సోమిరెడ్డి అప్పటి నుంచి కన్పించకుండా వెళ్లిపోయారు. దీంతో పోలీసులు సోమిరెడ్డి చంద్రమోహన్ రెడ్డి కోసం అన్ని ప్రాంతాల్లో వెతుకుతున్నారు. సోమిరెడ్డి చంద్రమోహన్ రెడ్డి నేరుగా న్యాయస్థానంలో హాజరుకావాలని భావిస్తున్నట్లు సమాచారం.

ముందస్తు బెయిల్ కోసం….

సోమిరెడ్డి చంద్రమోహన్ రెడ్డి వెంకటాచలం మండలం ఇడిమేపల్లి గ్రామంలో 2.41 ఎకరాల భూమి రికార్డులు తారుమారు చేసి కబ్జా చేశారన్న ఆరోపణలున్నాయి. దీనిపై కొందరు బాధితులు కోర్టును ఆశ్రయించారు. న్యాయస్థానం సోమిరెడ్డిపై కేసు నమోదు చేయాలని ఆదేశాలు జారీ చేయడంతో పోలీసులు రంగంలోకి దిగారు. తనపై తప్పుడు కేసులు నమోదు చేస్తున్నారని, రాజకీయంగా తనను ఇబ్బంది పెట్టడానికే ప్రస్తుత ఎమ్మెల్యే ఒకరు తనపై కక్ష సాధింపు చర్యలకు దిగారని సోమిరెడ్డి చంద్రమోహన్ రెడ్డి ఆరోపిస్తున్నారు.

కాకాణి పగపట్టారంటూ…..

సోమిరెడ్డి చంద్రమోహన్ రెడ్డికి, వైసీపీ ఎమ్మెల్యే కాకాణి గోవర్థన్ రెడ్డికి మధ్య ఎప్పటి నుంచో యుద్ధం నడుస్తోంది. గతంలో కాకాణి గోవర్థన్ రెడ్డిపై సోమిరెడ్డి మంత్రిగా ఉన్నప్పుడు కేసులు నమోదు చేయించారు. దీంతో కాకాణి గోవర్థన్ రెడ్డి సోమిరెడ్డి చంద్రమోహన్ పై మనీలాండరింగ్, విదేశాల్లో ఆస్తులు కూడబెట్టారని కూడా ఆరోపణలు చేశారు. దీనిపై సోమిరెడ్డి కాకాణిపై పరువు నష్టం దావా కూడా వేశారు. ఈ నేపథ్యంలో కాకాణి తనపై పగపట్టారని సోమిరెడ్డి చంద్రమోహన్ రెడ్డి చెబుతున్నారు. పాతకేసులను తిరగదోడి తనను జైలుకు పంపించాలని చూస్తున్నారని భావించి సోమిరెడ్డి అజ్ఞాతంలోకి వెళ్లినట్లు తెలుస్తోంది.

Ravi Batchali
About Ravi Batchali 30945 Articles
With twenty five years of  experience in Print / Electronic & Social Media, had an illustrious career in leading daily news papers. Very creative and a tenacious reporter of the news with a reputation for impeccable ethics. His passion for Community Journalism and his work as a staff reporter was widely acclaimed. An excellent storyteller who treats news, features and other events with equal priority.

Be the first to comment

Leave a Reply

Your email address will not be published.


*